އަހަރެމެންނަށް ކާންބޯން ދެއްވާ ރިޒުޤުދެއްވާ ފަރާތަކީ މާތް ﷲ އެވެ. އެހެންކަމުން ކާން ފެށުމާއި ނިމުމުގައިވެސް އެއިލާހު ހަނދުމަކޮށް، ޝުކުރުވެރިވާން ޖެހެއެވެ. މިގޮތުން މިކަން ކުރަންވީ ގޮތް މާތް ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމް ވަނީ ބަޔާންކޮށްދެއްވާފައެވެ.
ކާން ނުވަތަ ބޯން ފަށަމުން ޢަމަލުކުރަންވީ ގޮތް:
وَعَنْ عاَئِشَةَ رَ ضِيَ اللهُ عَنْهـَا، قَالَتْ: قَالَ رَسُولُ اللهِ صلى الله عليه وسلّم: “إِذَا اَكَلَ اَحَدُ كُمْ فَلْيَذْ كُرِ اسْمَ اللهَ تَعَالَى، فَإِنْ نَسِيَ اَنْ يَذْكُرَ اسْمَ اللهِ تَعالَى فِي أَوَّلِهِ، فَلْيَقُلْ: بِسْمِ اللهِ أَوَّلَهُ وَآخِرَهُ” (رَوَاهُ أَبُو دَاوُدَ، وَالتِّرْمِذِيُّ، حَدِيْثٌ حَسَنٌ صحيحٌ)
މާނައީ: މާތް ﷲ،އެކަމަނާއަށް ރުއްސުންލެއްވި ޢާއިޝަތުގެފާނުގެ ކިބައިން ރިވާވެގެންވެއެވެ. އެ ކަމަނާ ވިދާޅުވިއެވެ. رَسُولُ الله صَلّي الله عَلَيْهِ وَسَلّمَ ޙަދީޘްކުރެއްވިއެވެ. {ތިޔަބައި މީހުންކުރެ މީހަކު އެއްޗެއް ކާނަމަ (އެބަހީ: ކައި ބޮއި ހަދާނަމަ) ފަހެ، އެ ހިނދު ﷲ ގެ އިސްމުފުޅުގެ ބަރަކާތުން ފަށާހުށިކަމެވެ. (އެބަހީ: އެއްޗެއް ކާން ނުވަތަ ބޯން ފެށުމުގެ ކުރިން،
بِسْمِ اللهِ الرَّحْمَنِ الرَّحِيمْ
މިފަދައިން ކިޔުމަށްފަހު ކެއުމަށް، ނުވަތަ ބޯއެއްޗެއް ބުއިމަށް ފަށާށެވެ.) ފަހެ، ފެށުމުގެ ކުރިން ﷲ ގެ އިސްމުފުޅު ކިޔުމަށް (އެބަހީ بِسْمِ اللهِ ކިޔުމަށް ހަނދާންނެތިއްޖެނަމަ، ކައިބޮއެ ނިމިގެން،
بِسْمِ اللهِ أَوَّلَهُ وَآخِرَهُ
“ފެށުމުގައިވެސް ﷲ ގެ އިސްމުފުޅުގެ ބަރަކާތް އެކުލެވިގެންވާ ފަދައިން ނުމުމަށްފަހުވެސް، އެކަލާނގެ އިސްމުފުޅުގެ ބަރަކާތް ލިބިގެންވެއެވެ.” މިފަދައިން ކިޔާ ހުށިކަމެވެ.}
ކައިބޮއެ ނިމުމުން ޢަމަލުކުރަންވީ ގޮތް:
وَعَنْ مُعَاذِ بْنِ أَنَسٍ رَضي الله عَنْهَ، قاَلَ: قَالَ رَسُولُ اللهِ صَلى الله عليه وسلَّم: مَنْ اَكَلَ طَعَامًا فَقَالَ: {اَلْحَمْدُ اللهِ الَّذِي أَطْعَمَنِي هـَذَا، وَرَزَقَنِيهِ مِنْ غَيْرِ حَوْلٍ مِنِّي وَلاَ قُوَّةٍ.} غُفِرَ لَهُ مَا تَقَدَّمَ مِنْ ذَنْبِهِ”. (رَوَاهُ أَبُو دَاوُدَ، وَالتِّرْمِذِيُّ، حَدِيْثٌ حَسَنٌ)
މާނައީ: މާތްﷲ އެ ކަލޭގެފާނަށް ރުއްސުންލެއްވި މުޢާޛު ބްނު އަނަސްގެފާނުގެ ކިބައިން ރިވާވެގެންވެއެވެ. އެކަލޭގެފާނު ވިދާޅުވިއެވެ. رَسُولُ الله صَلّي الله عَلَيْهِ وَسَلّمَ ޙަދީޘްކުރެއްވިއެވެ.{މީހަކު ކާއެއްޗެއް ކެއުމަށްފަހުގައި (ނުވަތަ އެއްޗެއް ބުއިމަށްފަހުގައި)
” اَلْحَمْدُ لِلّهِ الَّذِي أَطْعَمَنِي هـَذَا، وَرَزَقَنِيهِ مِنْ غَيْرِ حَوْلٍ مِنِّي وَلاَ قُوَّةٍ”
(އެބަހީ: ޙަމްދު ހުރީ ﷲއަށެވެ. އެކަލާނގެއީ، އެތަކެތީގެ މައްޗަށް ތިމަންގެ އެއްވެސް ބާރެއް، ކުޅަދާނަކަމެއްނެތި، އެ ތަކެތި ތިމަންނާއަށް ކާންދެއްވި ރަސްކަލާނގެއެވެ. އަދި އެ ތަކެތިން އެކަލާނގެ ތިމަންނާއަށް ރިޒުޤުދެއްވިއެވެ.)މިފަދައިން ދުޢާކޮށްފިނަމަ، އެ މީހެއްގެ އިސްވެދިޔަ ފާފަތައް ފުއްސެވޭހުއްޓެވެ.
_________________
0 ކޮމެންޓު